Shpëton Teatri “Migjeni”. 86 milionë lekë për projektin e restaurimit nga qeveria shqiptare

ARKITEKTURA

Teatri Migjeni Prezantim

Në datën 15 qershor, në Shkodër u prezantua  projekti ri i Teatrit “Migjeni”. Ministria e Kulturës dhe qeveria shqiptare organizuan këtë operacion shpëtimi për Teatrin Migjeni, pa asnjë ndërhyrje  nga viti 1958.

Projekti është hartuar nga Instituti i Monumenteve të Kulturës dhe fondi i akorduar për fazën e parë të punimeve kap shifrën e 86 milion lekëve të reja.  Në prezantim morën pjesë artistë të Teatrit “Migjeni, si dhe personalitete të njohur të jetës kulturore të qytetit si : Bik Ndoja, Gëzim Kruja, Tonin Tërshana,  Bruno Shllaku, Fadil Kraja, Alma Hoti Memo, Rita Gjeka,  Merita  dhe Fatbardh Smaja, Jozef Shiroka, Emiljano Palali, të cilët diskutuan me Ministren Kumbaro për probleme të teatrit dhe jetës kulturore në qytet.

Ministrja e Kulturës, Mirela Kumbaro u shpreh se “Jam shumë e kënaqur që shoh shumë përfaqësues të artit dhe kulturës dhe dua të ndaj një lajm të mirë me ju, i cili ka qenë shqetësim i kahershëm për mua personalisht, por edhe për qeverinë shqiptare, gjendja e rrënuar e Teatrit  Migjeni. Vetëm pak muaj më parë, konkretisht në 4 shkurt 2015 kam marrë një letër të shqetësuar të drejtorit të Teatrit Migjeni, Edmond  Angoni, i cili njoftonte për gjendjen e mjeruar të ndërtesës dhe kushtet teknike, që e bënin të pamundur zhvillimin e  aktivitetit artistik.  Që nga momenti i marrjes së detyrës dhe deri më tani kam shpehur gadishmërinë dhe vullnetin e institucionit që drejtoj, në mbështetje të artistëve dhe skenës kulturore, sepse artin nuk e bëjnë politikat, por njerëzit e kulturës, skena nuk është e politikës, por e njerëzve të artit. Në pak muaj kemi bërë realitet një projekt  restaurimi të teatrit, i cili kap vlerën e 86 milionë lekëve, për të përballuar fazën e parë të restaurimit. Jam këtu për të shprehur gadishmërinë time dhe të gjithë qeverisë për restaurimin e teatrit,  jo vetëm si objekt kulture por edhe si monumente të njerëzve të kulturës. Ky fond  është hapur nga qeveria shqiptare që ta bëjmë realitet këtë projekt brenda vitit 2015”.

Faza e parë e projektit , quajtur edhe faza e shpëtimit është menduar të ndërhyjë në impiantet dhe sistemet teknologjike. Konkretisht do të ndërhyhet  në impiantin elektrik, i amortizuar dhe pa asnjë projekt që nga koha e ndërtimit, në impiantin mekanik të skenës dhe në impiantin e ndërrimit të ajrit. Projekti parashikon edhe ndërhyrje emergjente në sistemin e mbrojtjes nga zjarri, ku ekspertiza e kryer e gjen  jashtë  çdo sistemi funksional.

Në aspektin struktural do të ndërhyhet në strukturën e mbulimit në holl, skenë dhe sallë. Elementet arkitektonikë parashikojnë  ndërhyrje në çati, ku do të merren masa për vendosjen e kapriatave, binarëve, etj. Projekti parashikon ndërhyrje në katin e nëntokës  në sistemin e drenazhit dhe në fasadën e të gjithë ndërtesës.

Ky fond, i hapur nga qeveria shqiptare shkon paralelisht me rikonstruksionin e Teatrit “Andon Zako Çajupi” në Korçë, faza e pare e të cilave do të realizohet brenda vitit 2015.